हामी आफूले काम खोज्दै गर्दा होस् या त कसैको मूल्यांकन गर्दा होस् , कामलाई एउटा तह र सम्मान तोकिदिन्छौँ । कामप्रतिको यहि मानसिकताको कारण हामी कहिले बेरोजगार रहन्छौं त , कहिले सिक्ने अवसरबाट बन्चित हुन्छौं । त्यस्तै यसरि गरिने मूल्यांकनले मानिसहरुको क्षमता, उसको ज्ञान, पसिनाको अवमूल्यन गरिरहेका हुन्छौं भने उसले कोरिरहेको सुनौलो भविष्यबारे आँखा चिम्लिरहेका हुन्छौं । तर वास्तवमा, जीवनमा त्यो मानिस सफल हुन्छ जसले कामको तह तोक्दैन। जसले तल्लो तह भनिएको काम गर्छ उसले त्यो क्षेत्रको आधारभूत कुराहरुको ज्ञान लिने मौका पाउँछ र त्यो ज्ञान, अनुभव, मेहनतलाई बढाउंदै जाँदा सफल व्यक्ति बनेर उदाउँछ । यस्तै व्यक्ति मध्येका एक हुन्, भारतको जेट एयरवेजका मालिक, नरेश गोयल ।
भारतको पटियालामा सन् १९४९ मा एक व्यापारिक घरानामा नरेश गोयलको जन्म भएको थियो । नरेश गोयल सानो छंदा नै उनको परिवारको व्यापार घाटामा गयो र सबै सम्पत्ति गुम्यो । १२ वर्षका उनि परिवारको साथमा आर्थिक गरिबीसंग जुधे । उनि विद्यालय शिक्षा सकेपछि चार्टर्ड अकाउनटेन्ट पढ्न चाहन्थे तर परिवारको आर्थिक स्थितिले उनलाई साथ नदिंदा उनले त्यो सपनालाई मारेर १८ वर्षको उमेरमा बि.कम पूरा गरे ।
बि.कम पूरा गरिसकेपछि नरेश गोयलले आफ्नी आमाको काकाको ट्राभल एजेन्सीमा क्यासियरको काम गर्न थाले। उक्त काम बापत उनको मासिक तलब मात्र ३०० भा.रु थियो । त्यसपछि गोयलको मेहनत र लगनले गर्दा उनले एयरलाईन्सहरुमा काम गर्ने अवसर पाए । कामको राम्रो अनुभवले गर्दा उनले इरानमा आधारित एयरलाईन्सको म्यानेजर पदमा जागिर पाए। त्यसपछिको पांच वर्षसम्म गोयलले विभिन्न एयरलाईन्समा काम गरे ।
एयरलाईन्सको काममा पर्याप्त अनुभव बटुलीसकेपछि नरेश गोयलले आफ्नै ट्राभल एजेन्सी खोल्ने निधो । त्यतिबेला २५ वर्ष पुगेका उनले आफूले देखेको सपना “जेट एयर” पूरा गर्ने बाटो खन्न थाले । उनले आफ्नी आमाको गहना बेचेर १५,००० रुपैयाँ जम्मा पारेर र १०,००० लगानी गरेर ट्राभल एजेन्सीको रुपमा “जेट एयर” स्थापना गरे। उनको अथक मेहनतले ट्राभल एजेन्सी सफलताको बाटोमा हिंड्न थाल्यो । जेट एयरलाई जेट एयरवेजमा लैजान उनलाई केही वर्ष लाग्यो ।
सन् १९९१ मा भारतमा निजी एयरलायन्स खुल्न थाले । यहि मौकामा उनले आफ्नो ट्राभल एजेन्सीलाई एयरलाईन्समा लगे। सन् १९९३ अप्रिल १८ मा पहिलो पटक मुम्बईको सान्टा क्रुज एयरपोर्टबाट जेट एयरवेज उडेको थियो । हाल जेट एयरवेज विश्वकै प्रतिष्ठित कम्पनीहरुमा गनिन्छ । भारतको ट्राभल मार्केटको ३२ प्रतिशत सेयर यस कम्पनीले ओगटेको छ भने हाल ३,३०० करोड सम्पत्ति भएका नरेश गोयल भारतका १६ औं धनी व्यक्तिमा गनिन्छन्। उनि आफ्नो काममा सधै धैर्यवान तथा लगनशील बनेर लागे र अहिले पनि उनि उत्तिकै मेहनत गरिरहेका छन् । असाधारण व्यक्तित्वका धनी उनि सधै साधारण रुपमा प्रस्तुत हुन्छन् ।
जीवनका अभावहरुले नै हामीलाई धेरै कुरा सिकाउँछन्, समस्याहरुसंग जुध्न सक्ने आँट भरिदिन्छन् । तपाई समस्याहरु भन्दा माथि उठ्न तपाईंले सपना देख्न जरुरि छ र त्यो सपना पूरा गर्न तपाईंलाई तिनै समस्याहरुले सिकाएका अनुभव र हिम्मतले हतियारको रुपमा सहयोग गर्छन् । कामको सम्मान गर्नुस्, सपना देख्नुस्, मेहनत गर्नुस्, आफूमाथि भरोसा गर्नुस् , सफलता तपाईंको हातमा छ, चाहे ढिलो नै किन नहोस् ।
